Tentativa për të grabitur banesën e dy të moshuarve në fshatin Prush të Tiranës, ka shkuar keq. Grabitësit, tre persona të armatosur kanë hyrë në banesën e çiftit të moshuar duke u hequr si policë. Nën kërcënimin e armëve, rreth orës 19 e 13 minuta të së shtunës, grabitësit i kanë ulur në tokë të moshuarit dhe kanë kërkuar për para. Kanë qenë fqinjët ata që kanë lajmëruar policinë në pak sekonda pasi kanë dëgjuar zhurmën dhe britmat e pazakonta në shtëpinë e çiftit. Me marrjen e njoftimit shërbimet e Policisë kanë shkuar menjëherë në vendngjarje, por në momentin që janë afruar afër banesës, tre personat e armatosur, kanë qëlluar me armë ndaj tyre, ndërsa forcat e policisë i janë kundërpërgjigjur. Shkëmbimi i zjarrit nuk ka mjaftuar që të neutralizonte tre grabitësit. Policia e Tiranës e shoqëruar nga Forcat Renea dhe Forcat Kombëtare të Sigurisë, po vijojnë krehjen e zonës duke ngritur pika kontrolli në të gjitha akset kryesore dhe hyrje-daljet e Tiranës, për identifikimin dhe kapjen e autorëve të dyshuar. Ndaj çiftit të moshuar ka pasur kërcënime, por nuk është ushtruar dhunë thotë policia. Megjithatë të dy, ata janë të traumatizuar dhe nuk kanë mundur të identifikojnë asnjërin prej personave që tentuan të grabisin banesën e tyre.