Tirana është bërë këtë javë mikpritëse e kulturës saudite, falë organizimit për herë të parë në vendin tonë të Javës Kulturore të Arabisë Saudite. Aktiviteti u çel zyrtarisht në ambientet e Pallatit të Kongreseve, ku kultura, arti dhe trashëgimia saudite vijnë për publikun shqiptar përmes një sërë ekspozitash dhe veprimtarish. Ceremonia hapëse u nderua me praninë e ministrit të Ekonomisë, Kulturës dhe Inovacionit, Blendi Gonxhja, si dhe ambasadorit të Arabisë Saudite në Shqipëri, Faisal Ghazi Hivzi. Në fjalën e tyre, të dy theksuan rëndësinë e këtij shkëmbimi kulturor si një hap drejt thellimit të marrëdhënieve mes dy vendeve. Gjatë Javës Kulturore, vizitorët do të kenë mundësinë të njihen nga afër me elementët autentikë të traditës saudite që nga arti dhe muzika tradicionale, e deri tek ekspozitat me dorëshkrime të rralla arabe, të ruajtura në bibliotekat e Mbretërisë. Aktivitetet do të zgjasin deri më 20 shtator, duke ofruar çdo ditë mundësi të reja për të zbuluar një kulturë me rrënjë të thella dhe vizion bashkëkohor.