Për të parën herë në historinë e saj, Japonia ka një kryeministre femër: Konservatorja e linjës së ashpër, Sanae Takaichi do të marrë në dorë frerët e ekzekutivit me një prirje, sic thotë shtypi i huaj, për ta drejtuar shtetin nga e djathta. Një admiruese e hershme e ish-kryeministres britanike, Margaret Thatcher, dikur ndihmëse e ish kryeministrit të vrarë Shinzo Abe, arriti të siguronte 237 vota në Dhomën e Ulët të Parlamentit, nga 465 sa janë gjithsej. Fitorja e saj shënon një moment të rëndësishëm për vendin në të cilin kanë udhëhequr gjithmonë burrat. Takaichi pritet tani të ketë një qasje më të ashpër ndaj temave të tilla si emigracioni dhe çështjet sociale. Japonia është duke u përballur me rritje të çmimeve, situatë që e ka rritur zemërimin publik dhe e ka rritur mbështetjen për grupet e së djathtës. Takaichi zëvendëson në krye të ekzekutivit Shigeru Ishibën, duke i dhënë fund një boshllëku politik tremujor dhe një sërë mosmarrëveshjesh pas humbjes katastrofike zgjedhore të Partisë Liberale Demokratike në korrik. Ishiba, i cili shërbeu vetëm një vit si kryeministër, dha dorëheqjen së bashku me kabinetin e tij këtë mëngjes, duke i hapur rrugën krijimit të qeverisë së re. Edhe pse marrëveshja e LDP-së me Partinë e Inovacionit të Japonisë së krahut të djathtë i siguroi Sanae Takaichi-t postin e kryeministres, aleanca e paprovuar ende nuk ka shumicën në të dyja dhomat e parlamentit: kryeministrja e re do të duhet të joshë grupe të tjera opozitare për të miratuar çdo legjislacion, një rrezik që mund ta bëjë qeverinë e saj të paqëndrueshme dhe jetëshkurtër.