Zjarret që pushtuan Greqinë dhe Italinë nuk kanë qenë pasojë e temperaturave të larta por të shkaktuara nga dora e njeriut, i nxehti ekstrem thjesht ka përkeqësuar situatën. Ky është konkluzioni i autoriteteve në dy shtetet që u përfshinë nga zjarret këto javë. Ministri i Krizave Klimatike dhe Mbrojtjes Civile të Greqisë, Vassilis Kikilias teksa bëri një bilanc të vatrave aktive, njoftoi se pjesa më e madhe e zjarreve kanë qenë të qëllimshme. “Kanë rënë 667 zjarre, më shumë se 60 zjarre në ditë. Ato janë shkaktuar nga dora e njeriut”, u shpreh ministri. Në Greqi mbi 400 mijë hektarë tokë tashmë janë shkrumbuar nga vatrat e zjarreve. Në Itali raportohet se 60% e zjarreve u shkaktuan nga njeriu, ndërsa pjesa jugore vijon të mbetet e prekur rëndë. Sindikata Bujqësore “Coldiretti” në analizën e dëmeve nga zjarri, deklaroi shumë prej këtyre zjarreve mendohen se kanë pasur si shkaktar jo temperaturat e larta por njeriun. Por nga ana tjetër presidenti i Kalabrisë, Roberto Occhiuto, pretendoi se 80% e rasteve të zjarrvënieve në rajonin e tij kanë si shkaktar njeriun, një shifër më e lartë se ajo që raportoi sindikata. Si Italia ashtu edhe Greqia kanë arrestuar disa persona, të cilët akuzohen për zjarrëvënie të qëllimshme, në disa zona.