Pas sulmeve të ditëve të fundit dhe përshkallëzimit të tensioneve në Lindjen e Mesme, armëpushimi mes Shteteve të Bashkuara dhe Iranit duket se i përket tashmë së kaluarës. Deklaratat e fundit të presidentit amerikan Donald Trump dhe zhvillimet në Teheran kanë rritur frikën se dy vendet mund të hyjnë sërish në një fazë të re përballjeje. Vetë Trump konfirmoi se kontaktet diplomatike me Iranin vazhdojnë, por pranoi se armëpushimi nuk ekziston më. "Ne vazhdojmë bisedimet me Teheranin, por armëpushimi ka mbaruar", deklaroi presidenti amerikan, duke lënë të kuptohet se situata është shumë më e brishtë sesa ishte vetëm pak javë më parë. Deklarata më e fortë e Trump erdhi pak çaste më vonë, kur ai foli për kërcënimet ndaj jetës së tij. "Jam në krye të listës së tyre të goditjeve. Deri më tani mendoj se kam qenë pak me fat, por ndoshta ky fat nuk do të zgjasë shumë. Nëse më vrasin, kam lënë udhëzime specifike", u shpreh ai, duke ngritur alarmin për një plan të mundshëm iranian kundër tij.