Ish-presidenti Shteteve të Bashkuara të Amerikës Donald Trump u paraqit në gjykatën e Manhatin, teksa u përball me 37 akuzat kundrejt tij. Për orë të tëra ai u përball me trupën gjykuese, teksa i mohoi të gjitha pretendimet lidhur me mbajtjen e qëllimshme të dokumenteve sekrete të mbrojtjes, pengim të drejtësisë dhe deklarata të rreme. “Jam i pafajshëm”, kështu citohet të ketë thënë ish-lideri amerikan, sipas BBC. Avokatët Todd Blanche dhe Chris Kise po përfaqësojnë Trumpin në gjykatë, pas disa trazirash që u shkaktuan pak ditë më parë me ekipin mbrojtës. Kjo është hera e dytë që nga muaji prill, që Trump përballet me akuza penale në gjykatë. Por ndryshe nga rasti i Nju Jorkut, ekspertët ligjorë e kanë cilësuar aktpadinë e prokurorëve federalë, një çështje më të fortë. Akuzat përfshijnë ndër të tjera shkelje të ligjit të spiunazhit, i cili e konsideron një vepër penale mbajtjen e paautorizuar të dokumenteve që lidhen me mbrojtjen. Problemet ligjore nuk e kanë dëmtuar popullaritetin e Trump në mesin e votuesve republikanë. Sondazhet e opinionit publik e tregojnë atë shumë përpara rivalëve të tij, që garojnë për të siguruar kandidimin zyrtar nga partia. Shumë prej mbështetësve kanë pritur me brohorima dhe banderola në ambientet e jashtme ku mbërriti Trump. Njëkohësisht Walt Nauta, ndihmësi personal ushtarak i ish-presidentit, është përballur me akuzat si bashkëpunëtor, por i ka qëndruar mendimit për pafajësi.