Tensionet mes Izraelit dhe Hezbollahut janë rikthyer sërish në jug të Libanit, pavarësisht armëpushimit të shpallur muajin e kaluar. Ushtria izraelite u kërkoi banorëve të disa fshatrave që të evakuohen menjëherë, duke paralajmëruar sulme të reja kundër Hezbollahut. Paralajmërimi vjen pas shkëmbimeve të zjarrit mes dy palëve dhe sulmeve me raketa e dronë të ndërmarra nga grupi i mbështetur nga Irani. Ushtria izraelite u bëri thirrje banorëve të më shumë se gjashtë fshatrave në jug të Libanit që të evakuohen menjëherë këtë të shtunë, përpara sulmeve të pritshme kundër Hezbollahut, pavarësisht armëpushimit me Libanin që synon ndalimin e luftimeve. “Në dritën e shkeljes së marrëveshjes së armëpushimit nga organizata terroriste Hezbollah, IDF është e detyruar të veprojë me forcë kundër saj”, shkroi në X zëdhënësi në gjuhën arabe i ushtrisë izraelite, duke listuar nëntë fshatra. “Për sigurinë tuaj, duhet të largoheni menjëherë nga shtëpitë tuaja dhe të qëndroni larg fshatrave dhe qyteteve në një distancë jo më pak se 1,000 metra, drejt zonave të hapura”, shtoi ai. Pavarësisht marrëveshjes së armëpushimit në fuqi që prej mesit të prillit, forcat izraelite dhe Hezbollahu i mbështetur nga Irani kanë shkëmbyer zjarr çdo ditë, kryesisht në jug të Libanit. Të premten, Hezbollahu tha se kishte lëshuar raketa dhe dronë ndaj bazave ushtarake në Izrael, si hakmarrje për një sulm të fundit ndaj Bejrutit dhe goditjet e vazhdueshme në jug. Autoritetet libaneze raportuan se 11 persona u vranë nga sulmet izraelite në jug të vendit gjatë së premtes.