Sulmet izraelite vranë së paku 51 njerëz në jug të Gazës, sipas zyrtarëve mjekësorë palestinezë. Ushtria izraelite është duke kryer disa operacione tokësore në qytetin Kan Jonis. Autoritetet spitalore atje thanë se viktimat përfshijnë disa gra dhe fëmijë. Izraeli vazhdon prej një viti ofensivën në Gaza, që erdhi si përgjigje ndaj sulmit të Hamasit në tokën izraelite, më 7 tetor të vitit të kaluar, ku u vranë 1200 persona dhe u morën peng qindra të tjerë. Ofensiva hakmarrëse e Izraelit në Gaza, enklavë e kontrolluar nga Hamasi la të vrarë mbi 42.000 njerëz, sipas autoriteteve palestineze. Ndërkohë, gjatë ditëve të fundit, vëmendja është zhvendosur në Liban, ku Izraeli nisi një operacion tokësor kundër Hezbollahut, grup i shpallur terrorist nga SHBA-ja. Në përgjigje të “agresionit” në Gaza dhe Liban, Irani sulmoi Izraelin me raketa mbrëmjen e së martës, ndërsa Izraeli u zotua se do t’i përgjigjet.