Shtatë persona kanë mbetur të vdekur si pasojë e një sulmi izraelit në kryeqytetin e Sirisë, Damask. Pas sulmeve të vazhdueshme në jug të Libanit, Izraeli ka sulmuar edhe kryeqytetin e Sirisë dhe sipas ministrisë siriane të Mbrojtjes së këtij vendi, mes viktimave ka edhe gra e fëmijë. Ekipet e shpëtimit janë ende në kërkim të të mbijetuarve nën rrënoja, ndërsa sulmi i fundit ka rritur edhe më shumë shqetësimin për përshkallëzimin e konfliktit në Lindjen e Mesme. Ndërtesa e goditur nga sulmi është në lagjen Mazeh të Damaskut, e cila është shtëpia e ambasadave dhe selive të sigurisë, sipas ministrisë së Mbrojtjes. Tri katet e para të ndërtesës janë shkatërruar plotësisht, raportojnë agjencitë ndërkombëtare të lajmeve. Izraeli ndërkaq pretendon se Hashem Safedine, pasardhësi në pushtet i liderit të vrarë të Hezbollahut, Hasan Nasrallah, është eliminuar. Ministri izraelit i Mbrojtjes, Yoav Gallant, ka thënë se Hezbollahu tani është “një organizatë pa kokë” dhe se aty nuk ka kush të marrë më vendime dhe kush të veprojë.