Në kohën kur vëmendja e botës nisi të shkëputej nga Gaza pas arritjes së armëpushimit në enklavën e munduar nga lufta, sot mbërrin njoftimi se ushtria izraelite ka nisur papritur një ofensivë në veri të Bregut të pushtuar Perëndimor, të cilën IDF-ja e përshkruan si operacion të ri “kundër terrorizmit” në veri të Bregut të okupuar Perëndimor. Ushtria e shtetit hebre dhe shërbimi i brendshëm i sigurisë pohuan përmes një deklarate të përbashkët se “operacioni i gjerë antiterror po zhvillohet në zonën e Samarisë së Veriut” – duke përdorur kështu termin biblik izraelit për një pjesë të Bregut Perëndimor. IDF-ja sqaroi në një përgjigje për AFP-në se kjo ofensivë nuk është pjesë e operacionit të saj kundër terrorizmit që nisi në janar të këtij viti, i cili kryesisht shënjestron kampet e refugjatëve palestinezë. Dhuna në Bregun Perëndimor, të cilin shteti hebre e ka pushtuar që nga viti 1967, është shtuar ndjeshëm që kur Hamasi sulmoi Izraelin në tetor të vitit 2023, duke nxitur luftën në Gazë. As pushimzjarri i brishtë, në fuqi që nga 10 tetori, nuk ka mundur ta ndalojë dhunën plotësisht. Që nga fillimi i konfliktit, trupat e Izraelit por edhe kolonët izraelitë kanë vrarë në Bregun perëndimor më shumë se 1.000 palestinezë – shumica prej të cilëve militantë, por mes viktimave ka edhe dhjetëra civilë.