Kryeministri Benjamin Netanyahu deklaroi se Izraeli i dërgoi Turqisë një mesazh kundër ngritjes së një baze në Siri, duke pranuar në mënyrë të tërthortë autorësinë e sulmit të një dite më parë. Benjamin Netanyahu, kryeministër i Izraelit: “Ne nuk do të tolerojmë një dislokim ushtarak turk që shtrihet drejt jugut, sepse kjo na kërcënon. Këtë ua kemi bërë të qartë në terma të përgjithshëm. Më pas pamë se Turqia synonte të vendoste praninë e saj në një aeroport në jug të vijës ku operon, pranë Alepos, dhe i dërguam një mesazh. Si t’jua them? Mos e bëni. A u kuptua mesazhi? Po, por me sa duket nuk e dëgjuan, ndaj u siguruam që ta kuptonin edhe më qartë.” Ai deklaroi se Izraeli fillimisht kishte dërguar një mesazh “në terma të përgjithshëm” kundër pranisë ushtarake turke në një aeroport pranë Alepos, afër kufirit me Turqinë. Zyra e Netanyahut nuk e mori përsipër drejtpërdrejt përgjegjësinë për sulmin e së martës, por deklaroi se forcat turke e kishin inspektuar së fundmi bazën. Ajo paralajmëroi se Izraeli nuk do të toleronte një “kërcënim” që mund të vinte nga prania turke. Ambasadori amerikan në Turqi, Tom Barrack, i cili është edhe i dërguari i posaçëm i Shteteve të Bashkuara për Sirinë, fajësoi Izraelin për sulmin dhe e dënoi atë.