Ndërsa luftimet vijojnë intensivisht në Gazën Veriore, forcat izraelite paralajmëruan palestinezët që të largohen nga pjesët e Gazës jugore. Ky sinjalizim i banorëve tregon se Izraeli mund të zgjerojë ofensivën në zonat ku tashmë kanë shkuar qindra mijëra njerëz nga veriu i territorit që ndoqën urdhrat e mëparshëm për evakuim. Zgjerimi i operacioneve në jug - ku Izraeli kryen sulme ajrore të përditshme - kërcënon të përkeqësojë edhe më tej krizën humanitare në territorin e rrethuar. Mbi 1.5 milion njerëz janë zhvendosur brenda Gazës, shumica e të cilëve ka shkuar në jug, por edhe aty ushqimi, uji dhe energjia elektrike janë gjithnjë e më të pakta, ndërsa sinjalizimi i ri i ushtrisë për zgjerimin e ofensivës rrit edhe rrezikun për ta. Në kushtet kur Izraeli do zgjerojë luftën, nuk është e qartë se ku mund të shkojnë banorët e Gazës. Egjipti kufitar ka refuzuar të lejojë lëvizjet masive në territorin e tij. Ushtrarët izraelitë sakaq treguan edhe armët e gjetura në spitalin Al Shifa. Sipas zyrtarëve të ushtrisë në spital janë gjetur pushkë, municione dhe eksplozivë, si dhe kompjuterë e pajisje që përmbanin "informacion dhe pamje në lidhje me pengjet" e marra në sulmin tronditës të Hamasit në Izrael më 7 tetor. Tanket e ushtrisë izraelite ndërkohë kanë rrethuar edhe spitalin Baptist Al-Ahli rreth të cilit po zhvillohen luftime të ashpra me militantët e Hamasit. Pamjet: AFP