Ministri izraelit i Mbrojtjes, Joav Galant, tha të mërkurën se po fillon një “epokë e re” në përpjekjet luftarake të Izraelit. Ai e ka bërë këtë deklaratë pak pas shpërthimeve të pajisjeve të komunikimit të grupit Hezbollah në Liban, të cilat kanë lënë të vdekur të paktën 26 persona, dhe të plagosur më shumë se 3,000 të tjerë. Hezbollahu ka fajësuar për shpërthimet Izraelin, teksa është zotuar për hakmarrje. Duke pranuar në heshtje rolin e vendit të tij në shpërthimet në Liban e Siri, Joav Galant ka thënë se qendra e gravitetit të luftës po lëvizte në veri. "Rezultatet tona të deritanishme janë shumë mbresëlënëse”, ka thënë Galant gjatë një vizite në bazën e Forcave Ajrore në Izraelin verior. Komentet e tij shihen si pranimi i parë nga një zyrtar izraelit se forcat izraelite të sigurisë qëndrojnë pas operacionit të së martës në të cilin mijëra pejxher shpërthyen në të gjithë Libanin e Sirinë, dhe po ashtu pas sulmit të së mërkurës, ku shumë radiolidhje shpërthyen në Liban.