Ministri izraelit i Mbrojtjes, Israel Katz, tha se ushtria izraelite do të vazhdojë të sulmojë Bejrutin nëse Libani nuk e çarmatos Hezbollahun. Kjo deklaratë u bë një ditë pas një serie sulmesh izraelite që synonin lëvizjen libaneze pro-iraniane në periferitë jugore të kryeqytetit libanez. “Nuk do të ketë qetësi në Bejrut, as rend, as siguri në Liban pa siguri për shtetin e Izraelit. Marrëveshjet duhet të respektohen dhe nëse nuk bëni atë që është e drejtë, ne do të vazhdojmë të ndërmarrim veprime dhe me forcë të madhe”, tha Katz në një deklaratë. Ministri izraelit theksoi se po i përgjigjej drejtpërdrejt deklaratave të Presidentit libanez, i cili dënoi sulmet izraelite të mbrëmshme në territorin libanez, duke denoncuar “shkeljen flagrante” të marrëveshjes së armëpushimit që hyri në fuqi më 27 nëntor të vitit të kaluar. “Ju duhet të siguroheni që ushtria libaneze t’i përmbahet vërtet marrëveshjes së armëpushimit”, u përgjigj Katz në deklaratë. Është hera e katërt që Izraeli ka shënjestruar periferitë jugore të Bejrutit, një fortesë e Hezbollahut, që kur hyri në fuqi një armëpushim midis Izraelit dhe lëvizjes islamiste. Sipas kushteve të armëpushimit, organizata pro-iraniane duhet të tërheqë forcat e saj dhe të çmontojë të gjithë infrastrukturën e saj ushtarake në jug të lumit Litani, rreth 30 kilometra nga kufiri me Izraelin. Armëpushimi i dha fund më shumë se një viti armiqësish që kulmuan në një luftë të hapur dy-mujore midis ushtrisë izraelite dhe Hezbollahut, një konflikt nga i cili ky i fundit doli shumë i dobësuar.