Përgjatë së shtunës, forcat izraelite intensifikuan luftimet kundër militantëve të Hamasit në pjesën veriore të Gazës. Qielli mbi qytetin Jabalia në pjesën veriore të Gazës ishte i mbushur me tym nga bombardimet izraelite, ndërsa banorët e qytetit raportojnë se tanket izraelite kanë depërtuar në brendësi të qytetit. Shtëpia e Bardhë njoftoi se Presidenti Joe Biden bisedoi të shtunën mbi situatën me kryeministrin e Izraelit Benjamin Netanyahu. Aleati kryesor i Izraelit ka vijuar mbështetjen ndaj tij, por ka shprehur shqetësim mbi rritjen e numrit të viktimave civile dhe krizën humanitare në Gazë. Intensifikimi i luftimeve vjen pasi Këshilli i Sigurimit i Kombeve të Bashkuara miratoi një rezolutë që bën thirrje për dërgimin e më shumë ndihmave në Rripin e Gazës, duke mos përfshirë pjesën që bënte thirrje për armëpushim të menjëhershëm, një amendament ky i propozuar nga Rusia Në fillim të luftës, Izraeli i ndaloi të gjitha dërgesat e ushqimit, ujit, ilaçeve dhe karburantit në Gazë. Pas trysnisë amerikane, Izraeli lejoi kalimin e ndihmave përmes Egjiptit, ndërsa kjo rezolutë e detyron të mos i pengojë më ndihmat për civilët Sipas zyrtarëve izraelitë, rezoluta bën thirrje gjithashtu që të lirohen të gjitha pengjet izraelite të rrëmbyer nga Hamasi. “Është e rëndësishme të thuhet se në vendimin e OKB-së u miratua kërkesa për lirimin e menjëhershëm dhe pa kushte të pengjeve dhe kërkon trajtimin mjekësor pa pengesa për pengjet e mbajtura nga Hamasi. Ne i bëjmë thirrje komunitetit ndërkombëtar dhe organizatave ndërkombëtare që ta zbatojnë vendimin”, tha zëdhënësi i ushtrisë izraelite, Daniel Hagari. Sipas të dhënave të Hamasit, që nuk mund të konfirmohen nga burime të pavarura, gati 20,000 banorë të Gazës janë vrarë gjatë konfliktit 11-javor. Mijëra trupa të tjera njoftohet se kanë ngelur nën rrënoja. Pothuajse të gjithë banorët e Gazës, afro 2.3 milionë, janë zhvendosur. Sakaq, Izraeli thotë se ka humbur në luftime 140 ushtarë që kur nisi operacionin e tij në Gaza. Pamjet: AFP