Njësitë ushtarake të Izraelit kanë hyrë në tunelet e Hezbollahut dhe kanë kryer bastisje në Libanin jugor. “Wall Street Journal” raporton se forcat speciale izraelite po kryejnë bastisje të vogla dhe të synuara në Libanin jugor, në mënyrë që të mbledhin informacion dhe të përgatiten për mundësinë e një sulmi tokësor, i cili mund të nisë që në fillim të kësaj jave. Megjithatë, gazeta thotë se koha e inkursionit të mundshëm mund të ndryshojë, duke vënë në dukje se Izraeli është nën presion të madh nga Shtetet e Bashkuara për të mos nisur një operacion. IDF mund të kryejë bastisje më të mëdha në Liban, sesa një ofensivë tokësore, thuhet në raport. Rrjeti i tunelit të Hezbollahut është i gjatë disa qindra kilometra, tregoi një ekspert i luftës nëntokësore për The Times of Israel në janar. Edhe Hezbollahu kishte hapur tunele që të çonin drejtpërdrejt në Izrael, por ato u ekspozuan dhe u shkatërruan nga IDF në operacionin e janarit 2019, Mburoja e Veriut.