Kryeministri i Izraelit, Benjamin Netanyahu, deklaroi se rebelët Huthi të Jemenit do të paguajnë një “çmim të rëndë”, pasi një raketë e lëshuar prej tyre ra në një rajon qendror të shtetit hebre. Ushtria izraelite njoftoi se raketa ra në një zonë të pabanuar të dielën dhe se sistemet e mbrojtjes ajrore nuk arritën ta shkatërronin përpara se të hynte në hapësirën ajrore izraelite. Një hetim ka nisur menjëherë mbi incidentin. Kjo është hera e parë që një raketë e lëshuar nga ky grup, arrin në Izraelin qendror, i cili është rreth 2.000 kilometra nga Jemeni. Rebelët Huthi, grupi i armatosur që ka pushtuar pjesën më të madhe të këtij vendi gjatë luftës civile atje, njoftoi se ka përdorur një lloj të ri rakete hipersonike për operacionin e tij. Huthit e përshkruajnë veten si pjesë të “boshtit të rezistencës” - që udhëhiqet nga Irani - kundër Izraelit, SHBA-së dhe Perëndimit më gjerë. Grupi tha se sulmi i së dielës u krye në solidaritet me palestinezët dhe se Izraeli duhet të presë edhe të tjera përpara përvjetorit të parë të sulmeve të 7 tetorit.