Duket se Izraeli nuk ka hequr dorë nga synimi i tij për të nisur një ofensivë ushtarake në qytetin jugor të Gazës, Rafah. Radioja e ushtrisë izraelite njoftoi se pikërisht në Rafah ka nisur evakuimi i civilëve palestinezë. Qytetarët do të strehohen fillimisht në periferi të qytetit dhe më pas do të akomodohen në tenda në qytete si Khan Jounis dhe Al Muvasi. Ushtria izraelite tha ndër të tjera se do të përdorë të gjitha format e njoftimit të civilëve, që përfshijnë mesazhe me tekst, telefonata dhe njoftime me qëllim që të inkurajojnë lëvizjen graduale të civilëve nga Rafahu. Izraeli do të nisë ofensivën ne Rafah pasi beson se aty strehohen mijë luftëtarë të Hamasit, grup i shpallur terrorist edhe nga Shtetet e Bashkuara të Amerikës. Ushtria e Izraelit thotë se fitorja kundër Hamasit është e pamundur nëse nuk merr kontrollin e qytetit Rafah. Në këtë qytet kufitar me Egjiptin janë strehuar tashmë më shumë se një milion palestinezë dhe në rast të nisjes së një operacioni ushtarak frika për një numër të madh viktimash është e madhe, çka ka shqetësuar Egjiptin fqinjë, por edhe fuqitë perëndimore. Lufta mes Izraelit dhe Hamasit ka nisur shtatë muaj më parë, kur Izraeli ju përgjigj një sulmi të paprovokuar të Hamasit në tokën e tij, nga i cili mbetën të vrarë 1 mijë e 200 izraelitë. Në ofensivën hakmarrëse të Izraelit në Gaza, përllogariten 35.000 viktima, shumica gra dhe fëmijë.