Ndërmjetësuesit e Egjiptit dhe Katarit po zhvillojnë bisedime në Doha, një tjetër përpjekje kjo për të zgjatur armëpushimin në Gaza, pasi sot në mesnatë po i vjen fundi ditës së gjashtë dhe të fundit të pauzës. Burime të BBC-së thonë se si Izraeli ashtu edhe Hamasi janë treguar të gatshme për të negociuar për një zgjatje të re të armëpushimit. Në ditën e gjashtë të marrëveshjes u liruan 12 pengje të tjera, 10 izraelitë dhe 2 tajlandezë në këmbim të 30 të burgosurve palestinezë, ndërsa një tjetër shtetas amerikan parashikohet të lirohet deri në përfundimin e saj Aktualisht raportohet se Hamas ka në duart e tij 161 pengje izraelite. Ndërkohë Forcat e Mbrojtjes të Izraelit po vlerësojnë si të vërtetë një pretendim të Hamasit se një foshnjë 10 muajsh, Kfir Bibas 10 vëllai dhe nëna e tij nuk janë më gjallë. Hamasi nuk dha prova, por deklaroi se tre familjarët ishin vrarë në një sulm ajror të Izraelit Izraeli ndërkohë vijon t’i qëndrojë zotimit se do të fillojë luftën dhe se do të shfarosë Hamasin. Operacioni pritet të rinisë pas skadimit të marrëveshjeve që arrijnë palët me njëra-tjetrën, e në këtë pikë Izraeli do që të lirojë të gjithë pengjet e tij. Gjatë kësaj jave rajonin do ta vizitojë Sekretari amerikan i Shtetit Antony Blinken, ku në fokus do të ketë zgjatjen e armëpushimit. Administrata e presidentit Biden i ka bërë thirrje Izraelit edhe më herët që të shmangë sulmet në zonat ku ka popullsi civile dhe se të operojë vetëm në ato pjesë të Gazës ku ndodhen bazat e grupit terrorist të Hamas. Ndërkohë armëpushimi po shfrytëzohet nga Organizata e Kombeve të Bashkuara që po shpërndan ndihma humanitare për të gjithë civilët në Gaza. Pamjet: AFP