Top Channel/ Izraeli, 1 javë kohë Hamasit! Nëse s’arrihet marrëveshja, Tel Avivi do sulmojë në Rafah

Izraeli i ka vënë ultimatum 7 ditë kohë Hamasit për të gjetur një marrëveshje. Nëse kjo nuk arrihet, atëherë brenda një jave ushtria do të hyjë në Rafah. Kështu raporton “Wall Street Journal”, duke cituar burime egjiptiane. Ndërkohë, një lider i Hamasit ka akuzuar kryeministrin izraelit Benjamin Netanyahu se ka shumëfishuar deklaratat e tij në media për të sabotuar përpjekjet për armëpushim. Anëtari i byrosë politike të Hamasit, Hosam Badran, i tha AFP se po diskutonin propozimin e armëpushimit të paraqitur në fund të prillit edhe me grupe të tjera të armatosura palestineze, përpara se të ktheheshin në Kajro, ku do të zhvillohen negociatat indirekte me Izraelin. Ndërmjetësuesit nga Egjipti, Katari dhe Shtetet e Bashkuara janë ende në pritje në Kajro për përgjigjen e Hamasit ndaj kësaj oferte armëpushimi. Që nga 7 tetori i vitit që shkoi të paktën 34,622 palestinezë janë vrarë dhe 77,867 janë plagosur nga sulmet izraelite në Rripin e Gazës. Kjo është bërë e ditur nga Ministria e Shëndetësisë e Gazës e kontrolluar nga Hamasi. Ministria shtoi se 26 persona u vranë dhe 51 u plagosën në 24 orët e fundit. Pamjet: AFP