Tensionet në Lindjen e Mesme kanë hyrë në një fazë të rrezikshme, pasi Izraeli dhe Irani shkëmbyen sulme të ashpra ajrore gjatë orëve të fundit të së premtes. Pas një vale të dytë sulmesh izraelite ndaj objekteve bërthamore dhe ushtarake në territorin iranian, Teherani u kundërpërgjigj me lëshimin e qindra raketave drejt qyteteve izraelite. Izraeli goditi fillimisht 8 objekte bërthamore në të gjithë Iranin, duke lënë të vrarë 20 zyrtarë të lartë ushtarakë dhe shtatë shkencëtarë bërthamorë. Irani nga ana tjetër lëshoi një numër të madh raketash balistike, ndërsa pretendoi se ka rrëzuar dy avionë izraelitë dhe ka marrë rob një pilote femër, pretendime që janë mohuar nga ushtria izraelite. Të premten mbrëma, sirenat për sulme ajrore jehuan në Tel Aviv dhe Jerusalem, ndërsa shpërthime të fuqishme janë dëgjuar në të gjithë qytetet. Pamje të tymit të dendur mbi qiellin e Tel Avivit u transmetuan në mediat ndërkombëtare, duke treguar intensitetin e sulmeve. Ushtria izraelite njoftoi se sistemi i mbrojtjes ajrore ka ndalur shumicën e raketave iraniane, megjithatë disa prej tyre kanë depërtuar dhe shkaktuar dëme. Kryeministri izraelit Benjamin Netanyahu paralajmëroi se përplasjet mund të zgjasin për ditë me radhë dhe ka bërë thirrje popullit iranian të ngrihet kundër regjimit që, sipas tij, po i çon drejt katastrofës. Nga ana tjetër, lideri suprem i Iranit, Ajatollah Ali Khamenei, tha se Izraeli ka “iniciuar një luftë të hapur” dhe paralajmëroi se Teherani nuk do të ndalet pa i shkaktuar Izraelit pasoja të rënda. Presidenti amerikan Donald Trump, në një deklaratë për mediat, tha se Irani duhet të ulet urgjentisht në tryezën e bisedimeve, duke paralajmëruar për “sulme edhe më brutale” nëse nuk ndodh kjo. Ai konfirmoi gjithashtu se kishte zhvilluar një bisedë telefonike me Netanyahun të premten pasdite. Presidenti Emmanuel Macron deklaroi se Franca është e gatshme të mbrojë Izraelin nëse do të jetë nevoja. Ndërkohë, presidenti rus Vladimir Putin dënoi veprimet izraelite, duke u vetëofruar si negociator për dialog. Turqia, përmes presidentit Erdogan, reaguar ashpër, duke e cilësuar sulmin izraelit “një provokim të rëndë që po e çon Lindjen e Mesme drejt shkatërrimit.”