Turqia po përballet me një valë shkatërruese zjarresh pyjore që kanë përfshirë rajonet Izmir, Denizli, Aydın dhe Manisa gjatë 24 orëve të fundit. Në qytetin bregdetar të Izmirit, flakët shpërthyen duke arritur deri në zonat e banuara. Autoritetet kanë evakuuar të paktën 10 lagje, shumica në Seferihisar, për shkak të përhapjes së shpejtë të flakëve të nxitura nga erërat që arritën deri në 120 km/h. Evakuime emergjente dhe dëme materiale Në zonën Omur, një burrë i moshuar në karrocë u shpëtua në çastin kur shtëpia e tij filloi të digjej. Ekipet e Kërkimit dhe Shpëtimit në Izmir e dorëzuan atë tek shërbimet mjekësore dhe fatmirësisht gjendja e tij është e mirë. Sipas Ministrit të Mjedisit dhe Urbanizimit, 23 shtëpi dhe 47 njësi banimi janë shkatërruar, ndërsa 41 shtëpi dhe 25 stalla janë dëmtuar rëndë në provinca të tjera. Dyshime për zjarrvënie të qëllimshme Prokuroria e Izmirit ka nisur hetime për zjarrvënie të qëllimshme. Një person është arrestuar për përdorim të benzinës për ndezjen e zjarrit, ndërsa 17 të dyshuar të tjerë janë ndaluar për lidhje me zjarret që shpërthyen midis datave 26-28 qershor. Aeroporti Adnan Menderes në Izmir ka pezulluar përkohësisht të gjitha fluturimet hyrëse dhe dalëse. Fluturimet për në qytete si Stamboll, Londër, Këln, Kopenhagë dhe Sofje janë anuluar. Sipas Ministrisë të Bujqësisë dhe Pylltarisë, nga 77 zjarre të shpërthyera në një ditë, 9 janë të përmasave të mëdha, ndërsa 3 zjarre –mbeten aktive dhe serioze. Guvernatori i Izmirit, deklaroi se disa avionë mund të hedhin deri në 12 ton ujë, por operacionet ajrore janë të kufizuara për shkak të mjegullës dhe erërave të fuqishme. Hiri dhe tymi nga zjarret e mëdha në Turqi kanë mbërritur deri në ishullin grek Patmos, duke krijuar një atmosferë të rënduar. Pushuesit raportojnë errësim dhe erë të padurueshme në orët e pasdites. Ministria e Bujqësisë theksoi se “nuk kemi të bëjmë me një zjarr të thjeshtë pyjor, por me një betejë në shkallë të plotë”. Ai bëri thirrje për kujdes ekstrem nga qytetarët, pasi çdo pakujdesi mund të sjellë pasoja katastrofike. Aktualisht, nuk ka viktima në njerëz, por tre persona janë dërguar në spital për shkak të problemeve me frymëmarrjen si pasojë e tymit.