Interesi për të investuar në Shqipëri lindi gjatë një vizite në brigjet shqiptare, ndërsa sot është shndërruar në një nga projektet më ambicioze turistike në rajon. Në një intervistë të gjatë me David Senra, Ivanka Trump ndau detaje mbi vizionin për zhvillimin e Sazanit dhe të Zvërnecit, duke e cilësuar këtë investim si një mundësi unike për të krijuar një destinacion turistik të standardeve ndërkombëtare. "Përveç ishullit, kemi edhe rreth pesë milje vijë bregdetare përballë tij, një gadishull të mrekullueshëm me lagunë në njërën anë dhe det në anën tjetër, me plazhe të bukura me rërë të bardhë. Për mua kjo ndihet më shumë si një sfidë se sa si një biznes. Është kulmi i gjithë përvojës sime në pasuritë e paluajtshme, i gjithë udhëtimeve të mia dhe i reflektimeve të shumta mbi mënyrën se si dua të jetoj dhe si mendoj se gjithnjë e më shumë njerëz duan të jetojnë” Për vajzën e presidentit amerikan, projekti në Zvërnec dhe Sazan synon të ndërthurë natyrën, arkitekturën dhe funksionalitetin, duke sjellë në bregdetin shqiptar ekspertizën e disa prej arkitektëve më të njohur në botë. “Nuk ka asgjë më të shëmtuar sesa një hapësirë e bukur, por jo funksionale. Për mua, ajo nuk është një kryevepër, sepse nuk është menduar deri në fund. Kur arrin të bashkosh një arkitekturë me kuptim, të bukur dhe të menduar mirë me një hapësirë shumë funksionale, atëherë krijon diçka të veçantë. Një nga gjërat që dua tek pasuritë e paluajtshme është se janë diçka konkrete në një botë ku gjithnjë e më shumë gjëra nuk janë të tilla. Ti sheh rezultatin e viteve të tëra pune. Për të sjellë në jetë një projekt të tillë duhen vite, ndonjëherë edhe më shumë se një dekadë” për të njohur më mirë historinë, kulturën dhe identitetin shqiptar Ivanka Trump tregon se po lexon autorë shqiptarë dhe po kërkon të kuptojë vendin përpara se të vendosë gjurmën e saj përmes investimit. Sipas saj krijimi i një destinacioni të tillë kërkon kohë, vizion afatgjatë dhe një vëmendje të veçantë ndaj çdo detaji. Projektet në Sazan dhe Zvërnec konsiderohen ndër investimet më të mëdha turistike të planifikuara në Shqipëri. Përkrah potencialit për të tërhequr turistë me fuqi të lartë blerëse, ato pritet të sjellin zhvillim ekonomik, vende të reja pune dhe rritje të profilit ndërkombëtar të turizmit shqiptar.