Ivanka Trump, vajza e Presidentit amerikan, Donald Trump, është rikthyer në Shqipëri. Ajo mbërriti në Vlorë të mërkurën, ku shoqërimi i saj me eskortë dhe forca të shumta policie ka tërhequr vëmendjen e qytetarëve. Në mbrëmje, në Vlorë mbërriti dhe kryeministri Edi Rama, i cili u takua me Ivanka Trump, ku darkuan së bashku në qytetin bregdetar. Pas darkës, dyshja ka qëndruar për disa momente jashtë ambienteve ku u zhvillua takimi, duke shkëmbyer bisedë të shkurtër, ndërsa gjithçka është shoqëruar nga masa të rrepta sigurie. Më pas, Ivanka Trump është larguar në të njëjtin automjet me së bashku me Kryeministrin Rama, në drejtim të Orikumit. Vizita e Ivanka Trump në Shqipëri besohet të ketë lidhje me investimin në sektorin e turizmit, që kompania e bashkëshortit të saj, Jared Kushner, do të bëjë në ishullin e Sazanit. Edhe pse jo e konfirmuar zyrtarisht, gjatë qëndrimit në vendin tonë, pritet që Trump të zhvillojë takim me zyra arkitekturore. Ajo mbërriti në Vlorë në orët e paradites, ku menjëherë pas akomodimit në hotel, u drejtua në zonën e Novoselës, konkretisht pranë Hidrovorit, dhe ka vijuar më pas drejt zonës së Zvërnecit. Po ashtu, pjesë e itinerarin të saj ka qenë dhe zona bregdetare e njohur si Porto Novo. Kjo nuk është hera e parë që vajza e Donald Trump vjen në vendin tonë. Verën e 2025, Ivanka Trump ishte në në jugun e Shqipërisë me familjen e saj ndërsa në vitin 2024 kompania e Jared Kushner ka fituar statusin e investitorit strategjik për ndërtimin e një resorti turistik luksoz në ishullin e Sazanit.