Polonia dhe Italia nuk do t’i bashkohen Bordit të Paqes të presidentit amerikan, Donald Trump, kanë njoftuar të mërkurën Varshava dhe Roma. Agjencia e lajmeve “Reuters” raporton se këto dy vende i shtuar listës së aleatëve të Uashingtonit që po qëndrojnë në distancë. Fillimisht “Bordi i Paqes” ishte konceptuar për të forcuar armëpushimin në Gazë, por Trump e sheh atë me një rol më të gjerë në zgjidhjen e konflikteve globale, gjë që disa vende druhen se mund ta kthejë atë në një rival të Kombeve të Bashkuara. Fakti që Rusia dhe Bjellorusia janë ftuar të marrin pjesë, i ka bërë shumë vende perëndimore të mbajnë një qëndrim të rezervuar. “Duke marrë parasysh disa dyshime kombëtare lidhur me formën e bordit, në këto rrethana Polonia nuk do t’i bashkohet punës së Bordit të Paqes, por do ta analizojmë atë në vijim”, ka thënë kryeministri Donald Tusk në një mbledhje qeverie. Ndërkohë, ministri i Jashtëm italian, Antonio Tajani, ka konfirmuar gjithashtu të mërkurën se Italia nuk do të bëhet pjesë e bordit. “Nuk mund t’i bashkohemi Bordit të Paqes sepse ekziston një pengesë kushtetuese e pakapërcyeshme nga ana e Italisë”, ka thënë ai. Sipas kushtetutës italiane, vendi mund t’u bashkohet organizatave ndërkombëtare vetëm në kushte të barabarta me shtetet e tjera, një kusht që, sipas Romës, nuk plotësohet nga statuti aktual i bordit, i cili i jep Trumpit kompetenca të gjera ekzekutive.