ISIS ka marrë përsipër përgjegjësinë për sulmin me thikë në një festival në perëndim të Gjermanisë, ku u vranë tre persona dhe u plagosën tetë të tjerë. Në një deklaratë të shpërndarë në rrejtin Telegram, ISIS njofton se “autori i sulmit në një tubim të krishterësh në qytetin Solingen në Gjermani ishte një ushtar i grupit të Shtetit Islamik. “Sulmi u krye në shenjë hakmarrje për myslimanët në Palestinë dhe gjetkë" – thuhet në deklaratën e shtetit islamik. Sipas mediave në gjermani, një dëshmitar tha se kishte dëgjuar sulmuesin të bërtiste "Allahu Ekber" gjatë sulmit. Sipas Bild, policia është në kërkim të një burri të moshës 20 deri në 30 vjeç, pak më shumë se 1.70 metra i gjatë, me fizik sportiv dhe mjekër të shkurtër e të trashë. Kryebashkiaku Tim Kurzbach tha në një postim në Facebook se “në Solingen jane të gjithë të tronditur. “Të gjithë donim të festonim së bashku përvjetorin e qytetit tonë dhe tani kemi të vdekur dhe të plagosur për të vajtuar”- u shpreh ai. "Festivali i Diversitetit", që shënon 650-vjetorin e qytetit, filloi të premten dhe ishte menduar të zgjaste deri të dielën, me disa skena në rrugët qendrore që ofrojnë atraksione të tilla si muzikë, kabare dhe akrobaci.Solingeni ka rreth 160 mije banorë dhe ndodhet pranë qyteteve më të mëdha të Këlnit dhe Duseldorfit.