Autoritetet ukrainase e shpallën ish-shefin e fuqishëm të kabinetit të Volodymyr Zelenskyyt si të dyshuar në kuadrin e një hetimi të madh anti-korrupsioni, lëvizje kjo që ka të ngjarë të rrisë presionin mbi zyrën e presidentit në një moment delikat të luftës me Rusinë. Klasa politike e Kievit u trondit vitin e kaluar nga hetimi i gjerë që solli reagimin e ashpër të publikut dhe coi në dorëheqjen e ish-këshilltarit të lartë dhe krahut të djathtë të Zelenskyyt, Andriy Yermak. Në një deklaratë të dhënë së fundi, agjencitë ukrainase kundër korrupsionit thanë se “ish-kreu i Zyrës së Presidentit të Ukrainës” ishte mes personave të dyshuar për pjesëmarrje në një grup kriminal që kishte pastruar rreth 10.5 milionë dollarë përmes një kompleksi luksoz banimi në periferi të kryeqytetit ukrainas.Agjencitë nuk e përmendën Yermakun me emër, në përputhje me ligjin ukrainas, por ai u identifikua gjerësisht nga mediat vendase. Duke folur për Radio Liberty, ai mohoi se zotëronte vetë pasuri të paluajtshme në atë kompleks, por nuk dha komente të tjera. Ky rast, pjesë e një hetimi më të gjerë mbi korrupsionin në nivelet e larta, u bë publik për herë të parë në nëntor të vitit të kaluar, kur një ish-partner biznesi i Zelenskyyt u akuzua për drejtimin e një skeme ryshfetesh prej 100 milionë dollarësh në agjencinë shtetërore të energjisë atomike. Një ish-zëvendëskryeministër dhe bashkëpunëtor i afërt i Zelenskyyt u akuzua gjithashtu si pjesë e hetimit. Yermaku shihej gjerësisht si personi i dytë më i fuqishëm në Ukrainë pas Zelenskyyt, duke ushtruar ndikim të jashtëzakonshëm në pjesën më të madhe të politikës ukrainase, pavarësisht se nuk ishte i zgjedhur në atë post.Ish-producenti i filmave dhe mbështetës i industrisë së argëtimit shfaqej shpesh në krah të presidentit në ngjarje publike dhe kishte qenë gjithashtu negociatori kryesor i Kievit në bisedimet e paqes me Rusinë të mbështetura nga SHBA-ja. Dorëheqja e tij vitin e kaluar erdhi në kuadër të një riorganizimi më të gjerë të qeverisë, që synonte rikthimin e besimit te zyra e presidentit, e cila është shoqëruar nga akuza për centralizim të pushtetit.