Ish-ministrja e Jashtme e Gjermanisë, Annalena Baerbock është zgjedhur presidente e Asamblesë së Përgjithshme të Kombeve të Bashkuara me një shumicë dërrmuese votash. Përmes një votimi të fshehtë, Baerbock, 44-vjeçare, ka siguruar 167 vota, 14 anëtarë kanë abstenuar, ndërsa shtatë të tjerë kanë votuar për kandidaten tjetër. Zgjedhja e saj në seancën plenare para 193 vendeve anëtare të OKB-së është konsideruar formalitet, mirëpo votimi sekret është mbajtur, siç është raportuar, me kërkesë të Rusisë. Në fjalimin e saj, Baerbock deklaroi se dëshiron të udhëheqë këtë institucion si “ndërmjetëse e sinqertë dhe unifikuese”. Duke iu referuar krizave të shumta në botë, ajo ka thënë se koha që po jetojmë mbetet sfiduese dhe e vështirë. “Por, ne kemi jetuar edhe më parë nëpër kësi periudha të vështira. Na përket neve që të merremi me këto sfida”, ka deklaruar më tej ajo. Baerbock pritet të inaugurohet pozicionin e saj të ri më 9 shtator, pak para nisjes së seancës vjetore të Asamblesë së Përgjithshme të Kombeve të Bashkuara. Kjo pozitë njëvjeçare është kryesisht ceremoniale, ndërsa rolin më të lartë vijon ta mbajë Antonio Guterres, si Sekretar i Përgjithshëm të OKB-së.