Gjykata e Tiranës ka pranuar kërkesën për ekstradimin e ish-luftëtarit të Ushtrisë Çlirimtare të Kosovës, Dritan Goxhaj. Ai u arrestua më 31 korrik me urdhërarrest të lëshuar nga Gjykata Speciale e Kosovës, me qëllim ekstradimin në Hagë. Ai akuzohet se ka nxjerrë emrat e dëshmitarëve në disa çështje të hapura më parë nga Prokuroria Speciale e Kosovës. Goxhaj dyshohet se ka kryer veprat penale pengim i punës së zyrtarëve dhe frikësim i dëshmitarëve sipas Kodit Penal të Republikës së Kosovës dhe pritet të përballet me të gjitha akuzat në gjykatën ndërkombëtare të Hagës. Avokati Ardian Vishaj, që mbron interesat e Goxhajt, tha se kjo është një çështje me natyrë politike, teksa rreshtoi dhe pikat mbi të cilën ai ngriti mbrojtjen ndaj klientit të tij. Në afërsi të Gjykatës së Tiranës, gjatë zhvillimit të seancës ku u dha vendimi mbi ekstradimin e Goxhajt, u zhvillua edhe një protestë nga mbështetës të tij.