Ish-avokati i Donald Trump-it, Michael Cohen deklaroi të hënën gjatë dëshmisë në gjyq se ish-presidenti ishte i zemëruar për faktin që ish-aktorja e filmave për të rritur Stormy Daniels, po përpiqej ta shiste në vitin 2016 historinë e saj, mbi një takim intim të dyshuar me të. Sipas Cohen, Trump i kishte thënë se, nëse historia bëhej publike, do t'i shkaktonte një dëm serioz fushatës së tij për t'u zgjedhur. "Ai më tha se, do të ishte një katastrofë totale për fushatën. Gratë do të më urrejnë", deklaroi Cohen gjatë dëshmisë së tij në gjyqin penal ndaj ish-presidentit Trump në Nju Jork. I konsideruar si dëshmitari kyç i prokurorisë, ai tha se kishte mësuar se zonja Daniels po përpiqej të shiste historinë e saj në një moment kritik për kandidimin e Trump për Shtëpinë e Bardhë. Ky zhvillim erdhi sipas tij pas publikimit të një regjistrimi audio gjatë të cilit Trump, dëgjohej tek mburrej se mund "t’i prekte gratë në pjesët intime të tyre". Publikimi i kasetës vetëm disa javë përpara zgjedhjeve, shqetësoi zyrtarët e fushatës së Trump, të cilët kërkonin të minimizonin dëmin dhe në qendër të gjyqit është shuma prej 130,000 dollarësh, me të cilën Cohen pagoi zonjën Daniels, për të siguruar heshtjen e saj për marrëdhënien e dyshuar seksuale me Trump. Pamjet: AFP