Kur Shtetet e Bashkuara nisën ofensivën e tyre kundër Iranit gjashtë muaj më parë, sekretari amerikan i Mbrojtjes, Pete Hegseth, kishte premtuar një goditje të shpejtë dhe vendimtare, e cila do të shmangte sipas tij, një konflikt të gjatë dhe të zgjatur. E megjithatë, tani është vetë shefi i Pentagonit ai që po zgjat në heshtje dislokimin e trupave, një sinjal ky se konflikti mund të vazhdojë deri vitin e ardhshëm. Kështu shkruan Wall Street Journal, duke cituar burime që kanë dijeni për situatën. Sipas gazetës, bëhet fjalë për një strategji ushtarake afatgjatë, e hartuar për t’i ofruar presidentit Trump disa alternativa në lidhje me luftën. Strategjia përfshin dislokimin në rajon të 19 anijeve luftarake, njësive të mbrojtjes ajrore, skuadroneve të avionëve luftarakë dhe parashutistëve. WSJ thote se kjo prani e zgjeruar ushtarake po vendos nën presion të madh trupat amerikane dhe familjarët e tyre. Donald Trump nga ana tjetër vazhdon të pretendojë fitore. Nga Shtëpia e Bardhë, ai deklaroi se Shtetet e Bashkuara kontrollojnë Ngushticën e Hormuzit. Trump i bëri deklaratat gjatë një takimi me kandidatët republikanë për zgjedhjet e ardhshme të mesmandatit në SHBA. Situata në rrugën e rëndësishme ujore u tensionua ndjeshëm pas sulmit Iranian një sulm Iranian ndaj një cisterne saudite i kushtoi jetën dy marinarëve Filipinas. Kompania kombëtare saudite e transportit detar, Bahri, konfirmoi të mërkurën se anija e saj, Sidr, ishte “përfshirë në një incident sigurie gjatë kalimit nëpër Ngushticën e Hormuzit”. Sipas kompanise, Sidr u godit nga predha në veri të Gadishullit Musandam të Omanit. Në të njëjtën kohë, raportohet se edhe një supercisternë në pronësi koreano-jugore, Senegal Prosperity, u godit në lindje të Musandamit.