Dy ushtarë amerikanë u vranë dhe një tjetër rezulton i zhdukur pas sulmeve iraniane me raketa balistike dhe dronë në Jordani, thanë zyrtarët ushtarakë. Komanda Qendrore e SHBA njoftoi gjithashtu se katër anëtarë të tjerë të shërbimit amerikan u evakuuan për ndihmë mjekësore në spitalet në Jordani. Të tjerë ushtarë që pësuan lëndime të lehta u rikthyen në detyrë. Ushtria amerikane tha se kishte kryer natën e shtatë radhazi të sulmeve ndaj Iranit, që kur Presidenti Donald Trump shpalli fundin e armëpushimit. Nga ana e tij, Teherani kërcënoi me sulme të reja ndaj Arabisë Saudite dhe aleatëve të tjerë të Uashingtonit, ndërsa udhëheqësi suprem tha se “SHBA do të paguajë për shkeljen e marrëveshjes së armëpushimit”. Mbrëmjen e të shtunës, udhëheqësi suprem i Iranit, Mojtaba Khamenei, tha në një deklaratë me shkrim se "shkeljet e përsëritura" të marrëveshjes nga Amerika kishin "nxjerrë në pah një të vërtetë themelore: nënshkrimi i presidentit amerikan është krejtësisht i pavlefshëm".