Në një lëvizje të interpretuar si ulje tonesh me Izraelin, Irani njofto9i se do të lirojë së shpejti ekuipazhin e një anijeje të konfiskuar me flamur portugez, por që është e lidhur me shtetin hebre. Trupat e Gardës Revolucionare Islamike të Iranit e konfiskuan anijen MSC Aries së bashku me 25 anëtarët e ekuipazhit të saj në Ngushticën e Hormuzit më 13 prill, pak ditë pasi Teherani ishte zotuar se do të hakmerrej kundër një sulmi të dyshuar izraelit në konsullatën e tij në Damask të Sirisë. Republika islamike qe shprehur atëherë se do ta mbyllte tërësisht këtë ngushticë, e cila është rrugë shumë e rëndësishme tregtare. Sulmet kundër anijeve të mallrave kohëve të fundit në Detin e Kuq dhe në Gjirin e Adenit nga grupi jemenas, Huthi, i cili është i lidhur me Iranin, e kanë trazuar transportin tregtar botëror. Huthi ka thënë se po i kryen këto sulme në shenjë mbështetjeje për palestinezët në Rripin e Gazës, të cilët janë duke u përballur me një luftë tashmë gjashtëmujore me Izraelin. Ushtria izraelite sakaq ndërmori një sulm me dronë ndaj një makine në lindje të Libanit ku mbetën të vrarë dy persona. Ajo pohoi se shënjestra e goditjes ishte një zyrtar i al-Jamaa al-Islamiya që është aleat i grupit militant libanez, Hezbollah të lidhur me Iranin. Al-Jamaa al-Islamiya ka qenë mjaft aktiv së fundi në fshatrat e banuara me myslimanë sunitë që gjenden përgjatë kufirit të Libanit me Izraelin.