Media amerikane ka raportuar të hënën se Irani dhe satelitët e tij mund ta sulmojnë Izraelin brenda 24 orëve të ardhshme për t’u hakmarrë për vrasjen e liderit politik të Hamasit, Ismail Hanieh në fund të korrikut. “Fox News” i është referuar burimeve nga Lindja e Mesme, ndërsa ka disa ditë që po pritet sulmi i Iranit. Ndërkaq, një burim nga regjimi iranian ka thënë për “Financial Times” se “mund të mos ketë fare sulm, apo mund të ketë sulm edhe sonte”. “Pritja për vdekje është më e vështirë sesa vdekja vetë. Irani ka nisur një luftë psikologjike për të mbajtur ushtrinë e Izraelit, sigurinë dhe aftësitë logjistike në gatishmëri, duke iu mohuar banorëve të territoreve të okupuara ndjenjën e qetësisë”, ka thënë burimi. SHBA kanë dërguar nëndetëse në Lindje të Mesme ndërsa tensionet po rriten. Pentagoni ka urdhëruar dërgimin e një nëndetëseje me raketa të telekomanduara dhe kjo lëvizje vjen pasi frikës për një hakmarrje iraniane, pas vrasjes së liderëve të lartë të Hezbollahut dhe Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.