Një sulm nga Irani me dron në mbrëmje në zonat më luksoze të Dubait shkaktoi vdekjen e një personi, ndërsa dy ndërtesa të larta u përfshinë nga flakët. Fillimisht, qeveria e Emirateve të Bashkuara Arabe deklaroi se nuk kishte të lënduar. Por më vonë, u njoftua se një drejtues automjeti, me origjinë aziatike, humbi jetën nga rënia e pjesëve të ndërtesës pas sulmit me dron në kullën 19-katëshe Azayez në zonën luksoze Al Barsha, pranë Hipermarketit të njohur Lulu. Copëza në flakë ranë në tokë dhe nga Kulla Marina 23, duke shkaktuar dëme të mëdha në anën e ndërtesës. Flakët dhe tymi mund të shiheshin edhe nga ndërtesa 90-katëshe pranë Marinës së Dubait, pas sulmit me dron. Sipas Zyrës së Medias së Dubait, zjarri u shua shpejt dhe nuk pati viktima në sulmin në Kullën Marina. Sulmet e reja me dronë në zonat luksoze të Dubait erdhën pasi më herët një dron u rrëzua shumë pranë Aeroportit Ndërkombëtar, duke shkaktuar ndërprerje të përkohshme të fluturimeve. Një dëshmitar i tha agjencisë së lajmeve AFP se dëgjoi një shpërthim të fuqishëm në zonë, i ndjekur nga re tymi, ndërsa pamjet e verifikuara nga AFP regjistruan zhurmën e një droni të ndjekur nga një shpërthim i fuqishëm dhe re tymi pranë një aeroportit. Më vonë u njoftua se operacionet rinisën. Emiratet e Bashkuara Arabe deklaruan se janë në gatishmëri dhe se po i përgjigjen "kërcënimeve me raketa dhe dronë nga Irani". Zyrtarët deklaruan se sistemet e mbrojtjes ajrore po shkatërrojnë raketa balistike, ndërsa avionët luftarakë po shënjestrojnë dronët dhe mjete të tjera ajrore.