Shtetet e Bashkuara nuk kanë rrugë tjetër përveçse të pranojnë kundërpropozimin e Teheranit për fundin e luftës: Me këtë postim të tijin në platformën X, kryenegociatori i Republikës Islamike Mohammad Baqer Ghalibaf - i cili mban edhe postin e kryetarit të Parlamentit iranian- përcolli mes rrsshtash bindjen se në këtë pikë, vendi i tij ka epërsi në konflikt. “Nuk ekziston alternativë tjetër përveç njohjes së të drejtave të popullit iranian, sipas propozimit iranian me 14 pika, thotë më tej Ghalibaf, sipas të cilit çdo qasje tjetër “do të ishte e destinuar të dështojë”. Ndërkohë, zëdhënësi i Ministrisë së Jashtme iraniane, Esmail Baqaei, bëri të ditur se përgjigjja e Iranit ndaj propozimit amerikan iu dorëzua Uashingtonit më 10 maj përmes Pakistanit si ndërmjetës. Ajo përfshin ndalimin e luftës, heqjen e bllokadës amerikane në Ngushticën e Hormuzit, zhbllokimin e aseteve të ngrira iraniane dhe garantimin e sigurisë në rajon dhe në Liban. Ghalibaf paralajmëroi gjithashtu se zvarritja e procesit do të ketë kosto më të larta për SHBA-në, duke deklaruar se “sa më shumë të zvarritet situata, aq më shumë do të paguajnë taksapaguesit amerikanë”. Trump nga ana e tij insiston se objektivi i Shteteve të Bashkuara mbetet “fitorja e plotë”, dhe thotë se Irani beson gabimisht që Uashingtoni do të tërhiqet për shkak të lodhjes apo presionit politik.