Pak pas kërcënimeve të liderit shpirtëror të Iranit, Ali Khamenei se beteja e vërtetë fillon tani, agjensia shtetërore e lajmeve në Iran postoi në Instagram një video grafike- ku shihej një dorë që përkëdhetë një bombë bërthamore- një paralajmërim i qartë ky për Izraelin. “Ndoshta”, ishte komenti shoqërues i videos që përtej kërcënimit, ngre edhe pikëpyetjen nëse Irani po legjitimon kësisoj pretendimet e shtetit hebre se ai ka zhvilluar vërtet armë atomike. Khamernei shkroi më herët në X se “regjimit sionist i duhet dhënë një përgjigje e fortë. “ Ne nuk do t'u tregojmë mëshirë sionistëve”, ishte komenti i tij. Në ditën e gjashtë të konfliktit Izrael-Iran, nga Donald Trumpi sakaq, mbërrin sinjali tronditës se gjithmonë e më shumë po e ngrohb ideja e përdorimit të aseteve ushtarake amerikane për goditjen e objekteve bërthamore të Iranit, dhe po i largohet idesë së një zgjidhjeje diplomatike, të cilën e mbështeste me forcë deri pak kohë më parë. Mbi 30 cisterna ushtarake amerikane për furnizim me karburant janë dërguar në Lindjen e Mesme gjatë ditëve të fundit, thotë CNN duke cituar dy zyrtarë amerikanë. Nëse Presidenti Donald Trump jep urdhër që SHBA-të të përfshihen në konfliktin Izrael-Iran, cisternat mund të përdoren për të mbështetur misionet e avionëve luftarakë izraelitë kundër Iranit që kanë aftësinë e furnizimit me karburant në ajër. Pa këtë aftësi, avionët luftarakë të Izraelit e kanë të kufizxuar kohën e qëndrimit në ajër në qiellin e republikës islamnike. Edhe pse Forcat Ajrore Izraelite kanë disa avionë të tillë cisternë, ato nuk mjaftojnë për të mbështetur numrin e avionëve që Izraeli po dërgon në Iran, sipas burime ushtarake. Izraeli njoftoi së fundi se goditi një centrifuge të pasurimit të uraniumit, e Irani po ashtu ka ndërmarrë sulme të tjera duke bërë që sirenat të gjëmojnë dy herë gjatë natës, megjithatë korespondentet e huaj vërejnë se ka një rënie të ndjeshme të shkallës së goditjeve nga ana e Teheranit.