Irani ka lëshuar në hapësirë një satelit hulumtues, që bart një raketë të ndërtuar nga divizioni i hapësirës i Gardës Revolucionare Islamike. Lajmin e përcolli agjencia shtetërore e lajme, sipas të cilës sateliti Chamrat-1 me peshë 60 kilograme dhe një raketë Qaem 100, arriti me sukses në orbitë në 550-kilometra lartësi. Ky është zhvillimi më i fundit i një programi, të cilit Perëndimi i druhet se ndihmon Telehranin në avancimin e prodhimit të raketave balistike. Republika Islamike deklaroi se lëshimi shkoi pa probleme, por nuk dha detaje të mëtejshme e as nuk ssiguroi pamje filmike të ngjarjes. Në janar, Irani pohoi se kishte lëshuar në hapësirë tre satelitë përmes një rakete. Shtetet e Bashkuara insistojnë se nisjet e satelitëve nga regjimi i ajatollahëve janë në kundërshtim me një rezolutë të Kombeve të Bashkuara e cila i kërkon Teheranit të mos ndërmarrë asnjë aktivitet që përfshin aftësi të raketave balistike për të ofruar armë bërthamore. Por sanksionet e OKB-së sa i përket programit të Iranit mbi raketat balistike përfunduan tetorin e vitit të kaluar. Lëshimi i fundit vjen në mesin e një përshkallëzimi të tensioneve në Lindjen e Mesme, të nxitura nga konflikti mes Izraelit e Hamasit në Gaza, gjatë të cilit Teherani ndërmori një sulm të paprecedentë me raketa dhe dronë ndaj shtetit hebre.