Me sulmet izraelite, ku u vranë e u plagosë ushtarakë iranianë, një zëdhënës i forcave të Izraelit tha se misioni është që të ushtrohet presion mbi ushtrinë dhe udhëheqjen e Iranit në mënyrë që të mos riorganizohen. Agjencia e lajmeve Rojters njoftoi se bombarduesit e fshehtë B-2 që po lëviznin në ishullin e Guamit nuk do të thotë se SHBA do t'i bashkohen Izraelit në luftën kundër Iranit, pas spekulimeve se një lëvizje e tillë ndodhte për këtë qëllim. Avionët gjigantë, janë të vetmit të aftë të mbajnë bombën që shpërthen bunkerë, për të cilën ekspertët thonë se është e nevojshme për të shkatërruar objektin e thellë atomik të Iranit në Fordo. Objekti është rreth 100 metra nën tokë, i mbrojtur nga betoni i përforcuar. Pavarësisht superioritetit ajror, Izraelit i mungojnë municionet për të shkatërruar objektin, ndaj kërkon mbështetjen e SHBA-së. Rreth 9,500 km në lindje të Fordos, Guami, sipas disa ekspertëve, ndoshta nuk është baza e saktë nga e cila mund të nisë ndonjë sulm amerikan. Ministri i jashtëm i Izraelit Gideon Saar njoftoi se anëtarët e Gardës Revolucionare Islamike (IRGC) të Iranit "u përpoqën të kryenin një sulm ndaj qytetarëve izraelitë në Qipro" dhe autoritetet lokale parandaluan një ngjarje të tillë. Mediat lokale raportojnë se burri është me prejardhje nga Azerbajxhani dhe ka lidhje me Gardën Revolucionare të Iranit. Ndërsa Irani arrestoi një shtetas gjerman të akuzuar për "spiunazh në zona të ndjeshme ushtarake dhe bërthamore" në provincën qendrore Markazi. Ai kishte hyrë si turist, por sipas autoriteteve iraniane "kishte filmuar zona të ndjeshme në të gjithë vendin". Në mbrëmje, presidenti iranian Masoud Pezeshkian tha se vendi i tij nuk do ta ndalojë aktivitetin bërthamor dhe as nuk do të heqë dorë nga e drejta e tij për të ndjekur një program bërthamor civil. Ai foli në telefon me homologun francez Macron të cilit i tha se përgjigja e vendit të tij ndaj sulmeve të vazhdueshme izraelite do të ishte "më shkatërruese". Në takimin në Stamboll me ministrin e jashtëm të Iranit Abbas Arakçi, presidenti i Turqisë, Rexhep Taip Erdoan, deklaroi se rifillimi i bisedimeve bërthamore me SHBA-në është e vetmja mënyrë për të zgjidhur konfliktin me Izraelin dhe mosmarrëveshjen mbi programin bërthamor. Turqia, sipas tij është gati të luajë një rol lehtësues për të ndihmuar në rifillimin e bisedimeve.