Pas më shumë se një muaji bllokade, si hakmarrje ndaj operacionit ushtarak të Shteteve të Bashkuara të Amerikës dhe Izraelit, të nisur prej 28 shkurtit, Irani vendosi të hapë plotësisht Ngushticën e Hormuzit. Lajmi u bë i ditur nga ministri i Jashtëm iranian, Abbas Araqchi, i cili njoftoi se “Ngushtica e Hormuzit, rruga më e rëndësishme ujore për tregtinë globale, do të jetë plotësisht e hapur, për aq kohë sa do të zgjasë armëpushimi i arritur mes Libanit dhe Izraelit”. I menjëhershëm ishte dhe reagimi i Presidentit të Shteteve të Bashkuara të Amerikës, Donald Trump, i cili postoi një mesazh falënderimi pas njoftimit iranian, ndërsa u shpreh se ka dakordësi që ngushtica të mos mbyllet më. "Hormuzi nuk do të përdoret më si armë kundër botës! Irani ka rënë dakord të mos e mbyllë më kurrë ngushticën. Një ditë e madhe dhe e shkëlqyer për botën”. Nga ana e tyre, autoritetet iraniane njoftuan se Ngushtica është e hapur për të gjitha anijet tregtare gjatë pjesës së mbetur të armëpushimit 10-ditor midis forcave izraelite dhe Hezbollahut të mbështetur nga Irani, për të cilin arritën marrëveshje Izraeli dhe Libani nën ndërmjetësimin e Shteteve të Bashkuara. Armëpushimi 10-ditor mes palëve hyri në fuqi mesnatën e të enjtes, duke rritur shpresat për zgjidhjen e konfliktit mes SHBA dhe Iranit. Në një reagim të fundit, kreu i Shtëpisë së Bardhë urdhëroi Izraelin të mos sulmojë më.