Dy ditë para përfundimit të armëpushimit, Irani bën një hap pas dhe pranon negociatat me Shtetet e Bashkuara të Amerikës për t’i dhënë fund luftës. Zyrtarë në Pakistan, aty ku pritet të zhvillohen sërish bisedimet, thanë se Teherani është i gatshëm të marrë pjesë në raundin e dytë të negociatave me Uashingtonit. Presidenti amerikan, Donald Trump, u shpreh optimist për negociatat me Iranin dhe, sipas tij, nesër në mbrëmje ose të mërkurën në Islamabad do të firmoset një marrëveshje me Teheranin zyrtar. “Nëse nuk e nënshkruajnë marrëveshjen, Shtetet e Bashkuara do të hedhin në erë të gjitha termocentralet në Iran dhe shumë më tepër”, ka thënë Trump, sipas FoxNeës. Delegacioni amerikan, i drejtuar nga zëvendëspresidenti JD Vance, është nisur drejt Islamabadit për raundin e ri të bisedimeve, që është parashikuar të zhvillohet të mërkurën. Por, më herët gjatë të hënës, pala iraniane vuri në pikëpyetje negociatat, pasi Shtetet e Bashkuara shënjestruan një anije mallrash me flamur iranian në Gjirin e Omanit dhe morën kontroll të plotë mbi të. Fillimisht, Irani paralajmëroi mungesën në tryezën e negociatave dhe gatishmërinë e tij për rifillim të luftës, por më vonë, Presidenti Masoud Pezeshkian tha se “lufta nuk i sjell dobi askujt, çdo rrugë diplomatike duhet të përdoret për të ulur tensionet”.