Irani sulmoi Izraelin me 180 raketa balistike në përgjigje të fushatës së Izraelit kundër Hezbollahut të Libanit, duke shënuar një përshkallëzim të ri të konfliktit midis Izraelit dhe grupit militant të mbështetur nga Irani. Zëdhënësi ushtarak i Izraelit, Daniel Hagari, tha se ushtria nuk ishte në dijeni për ndonjë lëndim dhe, rreth një orë pas fillimit të sulmit, tha se tani izraelitët mund të dilnin nga strehimoret. Ai e përshkroi sulmin si serioz dhe tha se do të kishte pasoja të rënda për Iranin. Presidenti amerikan, Joe Biden, tha se Shtetet e Bashkuara ishin të gatshme ta ndihmonin Izraelin të mbrohej, ndërsa këshilltari amerikan për Siguri Kombëtare, Xhek Sallivan, e quajti këtë zhvillim një përshkallëzim domethënës nga Irani. Garda Revolucionare Islamike e Iranit tha se sulmi me raketa kishte si shënjestër tri baza ushtarake rreth Tel Avivit. Teherani gjithashtu paralajmëroi se nëse Izraeli do të reagonte, përgjigja do të ishte "më shkatërruese dhe rrënuese". Grupi palestinez Hamas, që është shpallur organizatë terroriste nga Shtetet e Bashkuara dhe BE-ja, e quajti sulmin "heroik." Për sulmin e Iranit reagoi edhe Donald Trump, që akuzoi Biden dhe Harris. “Ne nuk kemi lidership, askush nuk e drejton vendin. Ne kemi një President inekzistent si Joe Biden dhe një Zëvendës Presidente që mungon plotësisht, Kamala Harris, e cila është shumë e zënë me mbledhjen e fondeve në San Francisko. Dy të ata që drejtojnë këtë vend po na çojnë në prag të Luftës së Tretë Botërore”, shkruante kandidati për president në postimin e tij të gjatë.