Trazirat në rritje në Iran kanë marrë edhe më shumë jetë njerëzish në ditën e pestë të protestave kundër rritjes së ndjeshme të kostos së jetesës. Si agjencia e lajmeve Fars, ashtu edhe grupi për të drejtat e njeriut Hengaw, flasin për dy persona të vrarë gjatë përplasjeve mes protestuesve dhe forcave të sigurisë në qytetin Lordegan, në jugperëndim të Iranit. Tre persona të tjerë vdiqën në Azna dhe një tjetër në Kouhdasht, raportoi Fars, të gjitha këto në perëndim të vendit. Më herët, video të postuara në rrjetet sociale treguan makina të djegura gjatë përleshjeve të vazhdueshme mes protestuesve dhe forcave të sigurisë.Shumë protestues kanë bërë thirrje për përfundimin e sundimit të udhëheqësit suprem të vendit. Disa kanë kërkuar gjithashtu rikthimin e monarkisë. Me kalimin e ditës, u raportuan gjithnjë e më shumë trazira në mbarë vendin, në ditën e pestë të protestave, të nxitura nga kolapsi i monedhës. Video të verifikuara nga BBC Persian treguan protesta në qytetin qendror Lordegan, në kryeqytetin Teheran dhe në Marvdasht. Ndërkohë, mediat shtetërore thanë se një anëtar i forcave të sigurisë, i lidhur me Gardën Revolucionare Iraniane (IRGC), u vra gjatë përplasjeve me protestuesit të mërkurën në mbrëmje në qytetin Kouhdasht, në provincën perëndimore Lorestan. BBC nuk ka mundur ta verifikojë këtë, ndërsa protestuesit thonë se personi ishte një prej tyre dhe se u qëllua për vdekje nga forcat e sigurisë.Sipas mediave shtetërore, edhe 13 policë dhe anëtarë të Basij-it u plagosën nga gjuajtja me gurë në zonë. Shkollat, universitetet dhe institucionet publike u mbyllën në të gjithë vendin të mërkurën, pasi autoritetet shpallën një festë bankare, në një përpjekje të dukshme për të qetësuar trazirat. Zyrtarisht, masa u mor për të kursyer energji për shkak të motit të ftohtë, por shumë iranianë e panë atë si një përpjekje për të frenuar protestat. Protestat nisën në Teheran, mes tregtarëve të zemëruar nga një tjetër rënie e fortë e vlerës së monedhës iraniane kundrejt dollarit amerikan në tregun e lirë. Deri të martën, në protesta u përfshinë edhe studentët universitarë dhe ato u përhapën në disa qytete, me njerëz që brohorisnin kundër udhëheqësve fetarë të vendit. Këto protesta kanë qenë më masivet që nga kryengritja e vitit 2022, e nxitur nga vdekja në paraburgim e Mahsa Amini, një e re e akuzuar nga policia e moralit se nuk e kishte veshur siç duhet shaminë. Megjithatë, ato nuk kanë mbërritur të njëjtën shkallë.