Mesditën e sotme në Zvërnec u protestua nga qytetarë dhe shoqëria civile kundër një projekti turistik në zonë, ndërsa nuk munguan as përplasjet me policinë. Në mesin e tensioneve dhe për të sqaruar publikun ka reaguar kompania “Zvërnec South Adriatic Development” e cila sqaron se protesta të tilla nuk bëjnë gjë tjetër veçse përbaltin një sipërmarrje kolosale. Kompania sqaron se po ndërton në tokë private dhe në zbatim strikt të legjislacionit shqiptar. “Investimi parashikohet të arrijë vlerën e mbi 4 miliardë eurove, duke kontribuar me një rritje nga 3 deri në 4% në GDP e Shqipërisë, në 5 vitet e ardhshme. Po ashtu theksohet se “Investimi do të kujdeset tërësisht për ruajtjen e mjedisit dhe biodiversitetit të zonës dhe për këtë investitorët kanë angazhuar prej 2 vitesh kompetencat më të spikatura në nivel global, për studimet mjedisore përkatëse. Nga ky projekt i madh në turizëm do të krijohen mbi 10 mijë vende të reja pune, duke u bërë një motor i rëndësishëm për ekonominë e zonës, të qarkut Vlorë dhe gjithë Shqipërisë.