“Mafia shqiptare më merrte në telefon dhe më thoshte: ‘Duam të dërgojmë 500 kg drogë’. Nëse nuk pranon, të vrasin”. César (jo emri i tij i vërtetë) është një anëtar i Kings Latin, një bandë kriminale droge në Ekuador. Ai u rekrutua nga një oficer i korruptuar i policisë kundër narkotikëve për të punuar për mafian shqiptare, një nga rrjetet më të frytshme të trafikut të kokainës në Europë, shkruhet në artikullin e publikuar nga BBC. Mafia shqiptare ka zgjeruar praninë e saj në Ekuador vitet e fundit, e tërhequr nga rrugët kryesore të trafikut nëpër vend dhe tani ajo kontrollon pjesën më të madhe të rrjedhës së kokainës nga Amerika e Jugut në Europë. Pavarësisht se Ekuadori nuk e prodhon drogën, 70% e kokainës në botë tani rrjedh nëpër portet e tij, thotë presidenti ekuadorian Daniel Noboa. Ajo kontrabandohet në vend nga Kolumbia dhe Peruja fqinje, dy prodhuesit më të mëdhenj të kokainës në botë. Policia thotë se ka sekuestruar një sasi rekord droge të paligjshme vitin e kaluar, pjesa më e madhe e saj kokainë, dhe kjo tregon se eksportet totale janë në rritje. Pasojat janë vdekjeprurëse! Janari 2025 pa 781 vrasje, duke e bërë atë muajin më vdekjeprurës në vitet e fundit. Shumë prej tyre kishin lidhje me tregtinë e paligjshme të drogës. BBC raporton se ka kontaktuar njerëzit në zinxhirin e furnizimit për të kuptuar pse kjo krizë po përkeqësohet dhe si po e nxit atë rritja e konsumit evropian të kokainës.