Për qytetarët dhe bizneset serbe që kryejnë transaksione me valutën e Serbisë, dinarin do të ketë një fazë tranzitore për adaptimin e tyre, pas hyrjes në fuqi të rregullores së Bankës Qëndrore të Kosovës nga një shkurti. Zëvendëskryeministri i Kosovës, Besnik Bislimi thotë se do bëhet një fushatë informimi për qytetarët e bizneset në komunat me shumicë serbe. Kanë vetëm nevojë që të informohen për atë se në mes portmonesë tuaj dhe shitësit, para se ta bleni produktin apo shërbimin ekziston edhe një transaksion shtesë të konvertimit të valutës së huaj në valutën vendore Bislimi nuk ka dhënë informacione se sa do zgjasë periudha tranzitore, por që shton se fushata do të fokusohet tek bizneset. Duke folur për shqetësimet se qytetarët serbë që marrin pensione dhe paguhen nga Serbia nuk mund t’i marrin paratë, Ministri i Financave, Hekuran Murati ka thënë që këta qytetarë kanë edhe xhirollogari bankare në Kosovë e që lehtësisht mund t’i marrin. Më tepër ka qenë obligim dhe detyrim i shtetit serbë që e vetmja mënyrë që të pranojë pensionin ose pagën apo shtesën e ndihmën sociale është që të jetë në valutë të huaj, në dinarin serbë. Përmes transfereve ndërkombëtare, kjo zgjidhet shumë lehtë Sipas institucioneve të Kosovës janë mbi 33 mijë xhirollogari bankare në emër të qytetarëve të komunitetit serbë e që janë sipas rregullave të BQK-së.