Vladimir Putin reagoi pasi kompanitë shtetërore kineze të naftës pezulluan blerjet e naftës ruse, pas vendosjes së sanksioneve të reja nga SHBA-ja. Edhe India, blerësi më i madh i naftës ruse uli ndjeshëm importet e hidrokarbureve nga Rusia, në përputhje me sanksionet amerikane. Vladimir Putin deklaroi se Rusia nuk do të “përulet” kurrë përpara presionit amerikan. Ai ka pranuar, megjithatë, se sanksionet mund të shkaktojnë dëme financiare për vendin. Pavarësisht nga ky konstatim, Putin ka insistuar se sanksionet janë një “akt jomiqësor”, që nuk do të kontribuojnë në përmirësimin e marrëdhënieve midis SHBA-së dhe Rusisë. Ai i ka cilësuar përpjekjet për të ushtruar presion mbi Rusinë si të pasuksesshme dhe të kotë. “Çdo vend që respekton veten nuk do të veprojë kurrë nën presion”, ka shtuar Putin. Sanksionet e fundit të SHBA-së kanë bllokuar mundësinë e biznesit të kompanive dhe shteteve të tjera me prodhuesit kryesorë të naftës ruse, duke i shkëputur ata nga pjesa më e madhe e sistemit financiar ndërkombëtar.