Do të fluturojmë kudo që e lejon ligji ndërkombëtar. Kështu u shpreh sekretari i mbrojtjes ameriaken Lloyd Austin dhe paralajmëroi Rusinë të bëjë kujdes me avionët e saj. Deklarata e Austin erdhi menjëherë pas bisedës telefonike me homologun rus Sergei Shoigu në lidhje me incidentin e së martës mbi Detin e Zi, kur dy avionë rusë dyshohet se bënë veprime që rezultuan në rrëzimin e një droni vëzhgimi të SHBA-së. Shtetet e Bashkuara e cilësuan incidentin "të pamatur" dhe "joprofesional", ndërsa Moska mohoi se ishte fajtor dhe në vend të kësaj akuzoi Uashingtonin për kryerjen e fluturimeve "armiqësore" në rajon. Kryetari i Shefave të Përbashkët të SHBA, Mark Milley tha se Pentagoni është ende duke analizuar videon dhe të dhënat nga droni për të parë saktësisht se çfarë ka ndodhur. Ende nuk është përcaktuar nëse rrëzimi ishte i qëllimshëm. "Ne e dimë se përgjimi ishte i qëllimshëm. Ne e dimë se sjellja agresive ishte e qëllimshme, ne gjithashtu e dimë se ishte shumë joprofesionale dhe shumë e pasigurt," tha Milley. Austin shprehu vlerësimin për thirrjen telefonike, pas më shumë se një viti të luftës në Ukrainë, gjatë së cilës kontaktet e drejtpërdrejta midis zyrtarëve të lartë të mbrojtjes amerikane dhe ruse kanë qenë jashtëzakonisht të rralla. “Ne e marrim shumë seriozisht çdo potencial për përshkallëzim dhe kjo është arsyeja pse unë besoj se është e rëndësishme të mbahen linjat e komunikimit të hapura”, tha ai. Pamjet: AFP