Vizita e parë e presidentit të Ukrainës, Volodimir Zelensky në Shqipëri zgjati më pak se 24 orë. Mbrëmjen e së mërkurës pasi përmbylli një samit me plot deklarata kuptimplota në krah të kryeministrit Edi Rama dhe liderëve të tjerë të Ballkanit Perëndimor, Zelensky u largua nga Shqipëria. Avioni që e solli në Tiranë mbrëmjen e së martës, u rinisi sërish rreth orës 08:30 të së mërkurës, ndërsa Zelenskyn e përcolli në aeroportin e Rinasit ministri për Evropën dhe Punët e Jashtme, Igli Hasani. Pas samitit Ukrainë-Ballkani Perëndimor, Tirana do të jetë sërish sot mikëpritëse e tjetër samiti rajonal, atë mbi “Planin e Rritjes dhe Konvergjencës”. Fokusi i këtij samiti rajonal do të jetë integrimi i Ballkanit Perëndimor drejt Bashkimit Europian, si edhe zbatimi e Planit të Rritjes për Ballkanin Perëndimor. BE-ja do të hapë zona të caktuara të tregut të përbashkët të BE-së për partnerët e Ballkanit Perëndimor përpara anëtarësimit, duke sjellë përfitime të prekshme për qytetarët e tij. Ky samit do të ofrojë gjithashtu mundësi të reja për një shkëmbim pikëpamjesh mbi të ardhmen evropiane të rajonit dhe mbi sfidat e përbashkëta rajonale. Në samit do të jetë i pranishëm edhe Komisioneri i Bashkimit Evropian për Zgjerimin dhe Fqinjësinë, Oliver Varhelyi.