Një ngjarje e rëndë tronditi mbrëmjen e së dielës qytetin e Kavajës. Arjan Gosa 47 vjecc nga ky qytet u vra me një plumb në kokë, rreth orës 18.30, teksa po pinte një kafe në lokalin pranë shkollës "Rilindja" bashkë me të atin 78 vjeç. Veprimet e shpejta policore çuan në përcaktimin e pistës kryesore, atë të hakmarrjes dhe identifikimin e autorit të dyshuar. Pas këqyrjes së pamjeve filmike dhe verifikimeve të bëra, policia bëri të mundur identifikimin e autorit të dyshuar të vrasjes, i cili është shtetasi Habib Rexha, 31 vjeç, vëllai i Altin Rexhës, 43-vjeçarit që u vra në fund të marsit nga vëllai i Arjan Gosës, Edmond Gosa që gjithashtu mbeti i vrarë në atë ngjarje ku i pranishëm qe dhe djali i mitur i Altin Rexhës. Policia ka vënë në dispozicion shumën prej 10 mijë euro, për çdo informacion të vlefshëm që do të çojë në kapjen e autorit, duke garantuar anonimatin e plotë të çdo personi që jep informacion. Viktima Arjan Gosa ishte kthyer nga Italia pas vrasjes së të vëllait më 29 mars dhe ndodhej në pjesën e jashtme të lokalit kur atentatori i është afruar dhe e ka qëlluar. Më pas autori është larguar me vrap përgjatë rrugës kryesore.